阿拉年轻辰光，进工作单位个第一天，侪会发一套饭碗。阿拉会先拿一套饭碗带回屋里，拨爷娘看看。爷娘看到饭碗就会老开心个，碰到人就会讲，阿拉小人有饭碗了。上海人侪晓得个，有饭碗就是有工作了。人家会讲，恭喜侬，侬个小人出道了。

　　饭碗侪是搪瓷个，上面印了单位名字，埃个辰光小青年分配进单位，工资侪差勿多，大家就讲究单位名气响勿响。比如阿拉一幢房子楼上人家有个小姑娘，人长了好看，书也读了好，图又画了好，小学毕业就被录取了金银首饰单位。就是老有名气个,现在一个大明星浑身戴满黄金首饰为伊拉做广告个单位。全校就伊一个人录取，阿拉邻居侪夸伊聪明，看到伊就会讲，小姑娘真来三。阿拉姆妈就搭我讲，侬看人家小姑娘介小就有金饭碗了。我只好闷声勿响。

　　还有，阿拉隔壁邻居小姑娘搭我年龄相仿，学堂毕业伊分配进了电视机厂。阿拉伊个辰光侪是只有看黑白电视机，彩电是紧俏商品。伊拉屋里已经看彩电了。因为，电视机厂员工每人侪有一张买彩色电视机票子，阿拉侪眼热煞了。阿拉姆妈会讲，侬看人家小姑娘搿只饭碗多少灵光。我也只好闷声勿响，啥人叫我被分配辣呒啥花头个单位。

　　辰光过了老快，一晃阿拉小人侪也长大了，不过进工作单位已经勿发饭碗了，工资也有了蛮大个区别，学历高个工资也会高一点。阿拉爷娘看到第三代有工作了老开心个。一听伊拉工资还蛮高，就关照伊拉，好好叫努力工作噢，保牢搿只饭碗。阿拉小人回答，外公外婆晓得了，不过也勿搭界个噢，只要有本事，勿吓个，可以跳槽。阿拉爷娘笑起来了，搭我讲现在呒没饭碗搿种讲法了？怪勿得现在小青年进单位勿发饭碗了。不过也要关照伊拉，工作巴结点总归勿会错个。