老早上海服务行业个“扬州三把刀”名气非常响。此处个“扬州”是泛指苏北地区。上海个服务行业员工很大一部分是苏北人，亦以“三把刀”作标榜，有传承也有发展。“三把刀”──菜刀、剃刀、修脚刀，分别代表了餐饮业、理发业和洗浴业。“三把刀”既是讲个“软件”——三类员工独到个技艺，包括：厨师、理发师和足艺师，也是指三个行当个“硬件”：主要使用个工具（刀）。其实，另外还有一个“硬件”通行于三个行当，迭个就是“湿手巾”。

　　手巾是下过水拧干尚未散开个毛巾，就是“湿手巾”。而热个“湿手巾”，可算是服务行业对待客人个见面礼，勿论是餐馆、浴室，还是理发厅，进门坐下，就有人递来热个“湿手巾”（夏天或有递凉“湿手巾”个），伴随热情问候，一切服务由此开始。

　　各种行业中，以澡堂个热“湿手巾”最道地。其一是递得最勤。坐下一把，浴前一把，浴后一把，小睡后再来一把；若有别项服务（修脚、擦背等等）另加一把；起身出门照例还要递一把。如果碰上人多（业内谓之“客涌”），客人洗完还想贪睡一歇，服务员更是一把把递得“勤快”。搿辰光侬覅当补药吃，迭个就是“催客单”，有意提醒：“爷叔，覅歇睡得太长，后面客人等着呢，请前客让后客！”识相个会就此起身。

　　理发厅个热“手巾”进门时一般是呒没个，如果客满需要“坐等”，学徒工才会送过一把。夏天擦擦汗，冬天暖暖手，借此稳住客人。理发厅个湿手巾最大特点是喷香，搿当然是业务上个方便，满台子个化妆品，顺手取香水滴几滴而已。老上海理发，有一道湿手巾看得特重，搿就是光面孔之后个一把。头发剪短了，面孔浪个汗毛光过了，甚至连鼻孔、耳朵眼里个碎毛也修剪了一下，满面清新，耳鼻通畅。此时一道热湿手巾从额头至下巴抹过，身心怡悦，精神一爽。理发也是人生“一乐”，此刻当是最乐个时候。搿一道湿手巾，辣有心个老理发师手下是抹，是抚，是按摩，传递对顾客十分个敬重之心。老顾客一般勿调换理发场所，正是看重相熟个理发师代为抹面个搿份情意。

　　茶社、餐厅、饭馆一般只是进门出门各一把湿手巾，进门是洗风尘，出门是揩油腻。酒酣耳热、满面油汗时也有可能再递来一把。餐厅个湿手巾呒没浴室伊能热得烫手，也呒没理发厅里个香水味，特点是出奇个白净，让侬还呒没用餐先自认定搿家讲究卫生，食欲顿开。最感人个是茶房递过来湿手巾时总有一声“请慢用！”个问候，让客人听了心里受用。

　　戏院过去也有湿手巾，叠成一堆。侯宝林相声就说到过，解放前上海亦是如此。勿论是规模大个还是场面小个戏园，普遍有湿手巾，但仅限于送拨花钱泡茶水个观众。戏院里泡茶是个传统，早先场子里有桌子放茶具，后来改成多排座椅后，茶具无处搁，就辣椅背上挂个铁丝圈吊茶杯。招待员随时提着茶炊来泡茶，顺带递上热乎乎个湿手巾。大睁着双眼看戏，看得眼角生暘，此时有块热毛巾擦擦面孔自是舒适。不过却打扰了沉浸辣剧情中个邻座，难怪冲水个招待员走到阿里，湿手巾递到阿里，旁边总会有人勿开心。服务员有时还要隔座相互传递，搿就更打扰了。虽呒没相声说个“苏秦背剑”、“秦琼牵马”乃至“天女散花”诸多招式，不过台上演戏，台下人来人往，破坏了艺术欣赏氛围，实在是勿可取，解放后给废止了。