北京有私家车和快递三轮车因为碰擦造成争端个事体，汽车司机仗势欺人动手打了老实个快递员。媒体、舆论为受欺侮个快递员出头打抱勿平，就有了新个职业称呼：“快递小哥 ”。搿是北方口味个叫法。辣旧上海、老上海对三百六十行个从业者有上海味道个职业称谓个。送信、送报、送邮件包裹个邮局里当差叫做邮差。解放以后劳动者得到尊敬，邮差勿作兴叫唤了，叫做邮递员。还敢当面来叫人家为邮差个，是大人要吃批评，是小囡要吃牌头。老个称呼还有交关。到人家屋里向去帮佣个叫作佣人。女佣人称为娘姨。大人家雇用个娘姨多了，就取姓氏来区分，姓杨个叫杨妈，姓吴个叫吴妈。小姑娘出来帮佣，就是丫头。从小呒没缠过小足个就称为大脚娘姨。普通人家屋里向个男人帮忙做点家务，也被上海人戏称为大脚娘姨。东家寻来专门为小小囡做奶妈个是得到一点点敬重个，称呼为奶婶婶。到大人家去当差个男佣人，做扫地擦桌倒茶个叫茶房，做看门守门接待来客个叫门房。跟牢东家出门去办事体个叫跟班。为主人家开汽车个叫车夫。旧上海拉黄包车个是黄包车夫，踏三轮车个是三轮车夫。拉私家包车个就是包车夫了。搿点旧称呼后来被新风尚扫荡光了。去人家做帮佣个被尊称为劳动大姐。现在又有了更时新讲法，叫家政人员。从佣人、娘姨到家政人员可以看到社会个公平与进步。

　　老上海做有点文化有点专业含量工作个被大家称为先生。为人家算帐管帐个勿称会计、勿称出纳，尊为帐房先生。为人家做采购、做推销个称为跑街先生。马路浪有测字先生、算命先生。学堂里有教书先生。书场里有说书先生。旧社会贬称唱戏卖唱个为戏子，只有唱评弹，说大书个艺人被奉为先生。先生是肚皮里有墨水个。胸无点墨个勿敢称为先生。

　　有一技之长手艺个辣老上海称为师傅。使菜刀个叫做烧菜师傅、大师傅。使剃刀个叫做剃头师傅。弄针线个叫做裁缝师傅。从宁波来个老裁缝叫做红帮师傅。够勿上师傅水准个就只好屈居为匠人了。有木匠、泥水匠、铁匠、铜匠、鞋匠，拨老上海人喊得最顺口个就是小皮匠了。近几年来，师傅也成为了上海人对别人个一种尊称。叫人家为同志，太官方了。叫人家为朋友，太热络了。打招呼叫人为师傅，勿冷勿热，又有尊重个意思。也有闹笑话个辰光。问路问到了外地朋友：“师傅，请问……”“哎，俺没有教过你、带过你，不是你的什么师傅！”一鼻头灰。上海闲话辣今朝上海滩勿是通行无阻个。呵呵。