动物饼干辣阿拉小辰光，用现在个闲话来讲，就是一种小小个奢侈品，搿种眼福口福，阿拉一个号头顶多享受一趟。埃个辰光，每趟拿到爷娘买回来个动物饼干，总是舍勿得吃。阿拉会拿小动物们从纸袋里一个一个“拎”出来，放辣台子浪向“排兵布阵”：一歇歇让“大牛”去吃草；一歇歇让“兔子”去拔萝卜；一歇歇“让小鸡”去吃米；一歇歇又把“大老虎”摆辣最前头“呜吆三四”……就搿能几十块动物饼干，阿拉能开开心心个白相大半天。

　　埃个辰光，阿拉最最欢喜收集动物饼干里向个十二生肖。讲老实闲话，搿个难度蛮大个，每袋生肖饼干里向，总会少脱一两只动物，勿晓得啥个原因，收集个小动物中，“小猢狲”总是难板看到。后来一趟，阿拉爸爸关了饷，买来一袋生肖饼干里，阿拉发现了交关“齐天大圣”，真是额骨头碰到天花板了，勿要太开心噢。阿拉拿集起来个十二生肖饼干囥辣妈妈摆衣裳个柜子里，一有时间，就把伊拉“放”出来“透气”“溜溜”。

　　有一天，当阿拉再去衣裳柜里想看看十二只可爱个“小家伙”个辰光，却看到只有九只小动物了。块头最大个三只——“牛”、“虎”、“猪”，侪勿见踪影了。勿用猜，肯定是拨我馋老呸个弟弟给偷偷吃脱了。虽然只是三块生肖饼干，但阿拉真个把面孔板下来跟弟弟吵了一大相骂。妈妈为了安慰我，又特地为我买了一袋动物饼干回来。还算好，那三个生肖是经常看见个。

　　为了防止弟弟可能会再偷吃，阿拉把搿些生肖饼干统统囥了房间角落里另一只衣裳柜里。本以为万无一失，呒没想到，过了一段辰光，阿拉再次把伊拉搬出来“透气”“溜溜”，乃末勿好了，囥了太牢个几块生肖饼干要么“手臂膊”断脱了，要么“大腿”落脱了，块头完整个几块全身侪长满了绿毛——发霉了，勿要太难看噢。唉，真是罪过作孽啊！