上海人拿“看毛病”侪叫做“看医生”，小辰光弄勿明白，现在仔细想想，有一定个道理。侬生了毛病，到医院去，其实就是侬拨医生出了一道题目，就“看”医生哪能解决。

　　一要“看”医生个诊断技术。老底仔医生看毛病道行老深个。“病家勿用开口，便知病情根源”沪剧《芦荡火种》当中老中医个搿眼闲话邪气生动个讲出了老中医“看”病个功夫。告咾上海闲话有“我一搭脉就晓得侬心里想眼啥”。像听筒搭化验倒反而是辅助手段。乃末毛病的诊断邪气要紧，毛病查出才能对症下药。现在个医院设备侪老先进，勿晓得为啥有眼毛病倒反而查勿出。还有辰光，明明侬生个毛病勿算啥，稍微有眼功底就能“看”出来，也要横一遍竖一遍检查，好比大炮打蚊子，结果钞票白白用仔交关，增加病人个经济负担。

　　二要看医生个用药“艺术”。记得小辰光生毛病，医生配个是医院自家调制个药水，几角洋钿就拿毛病看好了。而现在，看趟毛病，用上几十上百元侪算毛毛雨，几百上千是家常便饭，几万几十万也是见多勿怪，用脱钞票勿去讲，还看勿好毛病。乃末现在个药也让人提心吊胆，侬勿晓得额角头高勿高，会勿会碰着“黑心药”。其实有眼毛病，用眼简单便宜个药就完全够了，看报纸介绍有一位医生就专门用尽量便宜个药看好了交关毛病，受到大家个欢迎。

　　告咾看医生一看“心术”，二看“医术”，只有两者结合，才能看好毛病。当然，大多数医生还是有着“治病救人”个人道主义精神，像电视剧《心术》里向个刘晨曦，现实生活中个吴孟超等，侪是医德和医术完美结合个典型。看医生能够碰着搿能介个医生也是侬个运道。不过现在各家医院门口侪有医生个排行榜，看毛病也真个是首先“看”医生，看来，上海闲话个构成真个是邪气有道理。