“秋风起，蟹脚痒。”大家开始摩拳擦掌觅奘【zang】蟹。上海人欢喜持螯赏菊闻桂香，从海派个奇思遐想里，一串搭“蟹”字相关个妙词佳语应“蟹”而出。

　　中秋买上市不久个蟹，先要“捏捏蟹脚硬勿硬”。后来搿句话就引申到“掂量掂量对方有几化能耐”个意思。碰着“撑脚蟹”，指脚伸直耷拉辣海个，就是要死快个蟹，“伊是撑脚蟹”，就是“伊情况勿妙，千万要当心伊”个意思。

　　称一个人“软脚蟹”，是骂伊软弱勿能，遇事只会退缩或者屈辱，硬勿起来。“蟹手蟹脚”，是讲手脚勿灵活，像蟹脚有伸有缩一样，动作配合勿协调，样子难看。“蟹爬”，样子歪斜难看：“侬两个字写得像蟹爬！”“蟹脚”，引申为“喽啰”、“下级帮凶”，拿伊个“蟹脚”侪拗脱，伊就成了一个“光杆司令”，就是“呒脚蟹”，只剩下来一只“蟹陀陀”，即一个“蟹身体”，动弹勿得，只差一口气，比喻自助无力，成了孤家寡人，呒没帮助伊个人。

　　再发展下去，就变成“死蟹一只”。“死蟹一只”有三层含义：一是身体疲惫勿堪，勿能动弹：做了一日重生活，到黄昏床浪一倒，死蟹一只！二是事体办糟弄僵，勿可挽回。三是一切呒没指望，束手无策。“死蟹”只有叫花子要吃个，有个歇后语叫“叫花子吃死蟹———只只好”，常比喻伊个要求交关低，样样侪接受。上海话里还有两个歇后语，一个叫“飞机浪吊大闸蟹———悬空八只脚”，就是做事体呒没分寸，离开事实忒远；或者牛皮吹得野豁豁，事体完全呒没可能个，做出来连“蟹也会笑”！另外一个叫“大闸蟹穿淮海路———横行霸道”。上海还有一个气象谚语，“蟹爬高，要发大水”。

　　“老蟹打洞，小蟹受用”，就是讲儿孙辈坐享父辈所创个福。不过，呒没志气个子孙，就是“一蟹勿如一蟹”，一个勿如一个，坐吃山空，三代而亡。相反，有本事个小囡，“虾有虾路，蟹有蟹路”，一个个侪各自有各自个法道或者门路，后来各显春秋。

　　假使讲“乌龟是十三块六角”个闲话，葛末“蟹是一块两角八”，一块蟹陀，两只蟹鳌，八只脚。蟹壳有一种特殊个青颜色，上海人拿一种像蟹壳一样个颜色叫伊“蟹壳青”或者“蟹青”；上海人也拿一种状似蟹壳个饼叫做“蟹壳黄”，还因为伊上面一层皮个颜色像烧熟个蟹壳颜色。还有一种像蝴蝶酥搿能个甜点，叫伊“蟹派”，“派”是pie个英译。

　　现在还有两个新个蟹名字，就是拿外头捉着个蟹摆到阳澄湖水里去浸个N日，就会摇身一变改变籍贯，大家叫伊拉“汏浴蟹、留学蟹”。

　　大家看崇明人“作啥”？就是“捉蟹”！崇明话“啥”读“蟹”音，葛咾“作啥”搭“捉蟹”同音。其实上海勿只是崇明闲话搿能讲，奉贤、松江“蟹、啥”两字也同音。大概崇明产蟹多勿过、有名勿过，所以大家碰碰就欢喜提到“崇明蟹”，到崇明去“作啥”？去“捉蟹”！