老早我进单位个辰光，每个号头发工钿个日脚叫关饷。伊个辰光关饷是桩老大个事体。一来，屋里向就业人数少，工钿又小，一个号头个开销就指望发工钿迭日天；二来，除脱基本工资外，呒没其他经济来源。

　　当时我个单位是集体所有制，每个号头12号发工钿（国营单位为5号，可见啥个辰光发工钿也有讲究个）。伊格辰光，老职工工钿是50元左右，学徒每个号头是16.84元（迭个是集体所有制，全民所有制为17.84元）。分发到每个职工手里，需要各种面值票面。伊格辰光格票面最大是10元，最小是1分。我是做财务个，有一趟发工资，我拿票面分析单填错了，结果多领了1角洋钿个50块钞票，最后将搿眼厚厚个50元1角洋钿统统装到一个职工个钱袋里，迭个职工认为阿拉会计部门对伊有意见，产生了一场误会。阿拉单位百把个人，每个号头关饷个钞票总额也就四万多块。从银行拿钞票领转来后，先全部复核一遍，迭个复核勿像现在有点钞机，速度快来，伊格辰光侪是手工点个。所以到现在我点钞票个速度还蛮快，就是伊格辰光练出来个。只有等所有钞票分装完毕，“龙门碰平”，呒没一分洋钿差错，再好发放。

　　有眼人拿了工钿，马上拿钞票交拨拉等了办公室外头个屋里向人，豪燥让伊拉去买米买油，或者还债头（向别人借个钞票）。做啥介急吼吼，倒勿是担心涨价，挨个辰光物价老稳定。就是因为响应号召做光荣妈妈，乃末屋里小囡特别多，一个号头才50元左右个收入，寅吃卯粮，前吃后空的现象老普遍。老职工讲，啥个辰光关饷能有100块洋钿就好了。眼睛一眨，现在发工钿拿100块洋钿也成为历史了，发工钿叫关饷个讲法也听勿到了。甚至发工钿个方法也发生老大变化，职工随时用卡或用存折到银行里拿钞票就可以了。现在碰到关饷日，早浪8点勿到，交关老人就垃拉银行门口排队了，有人走路抖抖豁豁了，甚至是垃拉子女陪同下来个。其实，伊拉之所以垃拉关饷日到银行，主要是搭老朋友老同事碰碰头，讲讲老年人关心的话题，搿种排队跟当年不可同日而语了！