历朝历代侪有清官。明代有海瑞，清朝也有个搭海瑞名气一样响个清官，伊叫于成龙。

　　前些时候报纸浪向登，山西省出了一窝贪官，吕梁是山西腐败重灾区，巧得勿得了，迭个地方正是于成龙个老家。伊从七品县官做到两江总督，一身正气，两袖清风，伊有个外号，叫“于青菜”。为啥叫“于青菜”?因为伊吃饭个家常菜，大多是青菜，还用糠皮加米烧粥，搭佣人一道吃，一年难得吃几趟肉，所以大家叫伊“于青菜”。

　　“于青菜”勿光吃得省，住也勿讲究。伊辣广西罗城做县太爷个辰光，住三间茅草房，用土坯搭起台子办公。伊看见当地老百姓生活苦，自家也由原来一天吃两顿饭，减成吃一顿，老百姓听说后，凑了一点银子，为伊买来米搭盐。伊统统勿要，拱拱手谢谢大家：“我一个人辣迭搭过日脚，够吃够用了。大家拿回去孝敬自家爷娘，等于送拨我一样。”伊个儿子从山西老家来探亲，也是餐餐青菜豆腐，临走时，伊拿一只舍勿得吃个咸鸭，割了半只交拨儿子，算是带回老家个礼品，所以百姓又叫伊“半鸭知县”。1678年，伊做福建按察使个辰光(相当福建省省长)，乘船去上任。快开船了，伊叫手下人买了好几担萝卜带走。送行个人觉得蛮怪，问伊:“侬买介许多萝卜做啥？”伊讲:“一为了压船，第二，我一路上吃个，就全靠搿点萝卜了。”

　　伊当上两江总督后，到南京就职，南京个布价马上涨价。因为“于青菜”从来勿穿绸缎做个衣裳，富户人家赶紧买布做新衣,欢迎新官上任，头子活络个官员也要做几套布衣裳装装门面。因此，布店生意交关闹猛。于成龙做了大官，吃饭仍旧以青菜做主菜，或者加只豆腐汤。伊个佣人勿舍得用铜钱帮伊买茶叶，每日到衙门后院采槐树叶子拨伊泡茶喝，到后来树叶吃光了，槐树成了秃树。伊天南地北做官20多年，单身跑来跑去，勿带家眷，更呒没“小三”，一个结发妻子分别20年，只见过一次面。伊到下面视察，拒绝接风赴宴，更勿接受部下送礼，使得江南风气大正，民间纷纷仿效，形成廉洁自律个官风。

　　于成龙勿单单自身过得硬，还下大力气惩治腐败、平反冤案。福建当时冤狱成灾，街头侪是孤儿。伊到任后，想重审一起冤案，被上司赵秉章斥责，又遭皇帝个阿弟康亲王讽刺，伊一怒之下，要撞柱自杀，康亲王只得答应重审迭只案子，结果，受冤枉个犯人统统放出来，贪官被关了起来。为了救助流落辣街头个孤儿，于成龙把伊拉收到官衙里收养，花光了自家个俸银还勿够，只好派佣人到当铺去当自家个衣物，结果被康亲王发现当票，传到了康熙皇帝个手里向，于成龙升任直隶巡抚，管河北两省。康熙皇帝有个亲外甥叫喀礼，因为胡作非为，被于成龙查明后杀了头。康熙皇帝晓得之后，对于成龙再提拔重用。伊还下发过一份《通饬各属私派纳访檄》个文件，要求捉拿衙门里个蠹虫，交关“蚊子”侪勿敢吸老百姓个血了。

　　于成龙活了68岁。伊去世个辰光，搭伊办丧事个官员，到伊房间里清点遗物，看见床头有布袍一件、鞋一双，堂后碎银三两，铜钱二千，瓦罐里只有粟米五斗，盐豆豉几钵，大家痛哭失声。伊去世个消息传出，市民罢市，男女老少侪趴辣地上大哭。康熙皇帝听到下面报告,也伤心个讲：“做官像于成龙者，有几个人？”称伊为“天下廉吏第一”。

　　听说现在山西准备重修于成龙个墓地搭故居。迭个是一只好点子。早点建成搿个纪念馆，对于今朝个反腐倡廉，好处是蛮多个。