泡饭是上海人个标准早饭，也排得上灶披间里个上海符号。告【同】北京人个炸酱面广东人个煲仔粥一样，泡饭常庄搭上海人连拉一道个。

　　要晓得啥叫“上海人会得过日脚”，侬也来吃吃泡饭就晓得了。泡饭总归是用隔夜吃挺【剩】下来个冷饭烧个——搿个就是物尽其用，勿浪费。泡饭只要用哒哒滚个开水冲泡焐热或者烧开了就好——搿个叫又快又便当。泡饭讲饭勿是饭，话粥勿是粥：有得饭个足实、经饿，又有得粥个汤水、湿滑；用勿着细嚼慢吞，也勿像吃汤介快。可以一顿早饭只吃泡饭对付过去，也可以垃大饼、油条、粢饭、馒头、粽子、面包、蛋糕咾啥里头趁侬高兴随便拣一两样干点心再吃吃饱——葛倒真个叫实惠。吃泡饭离勿开“咸小菜”，一般是咸菜酱瓜榨菜萝卜干，咸蛋皮蛋花生米熏青豆豆腐干，酸辣菜腌辣椒酱生姜酱落苏，咸鱼咸肉乳腐霉麸糟毛豆；也可以拿碗头碗脚剩下来个荤素小菜连汤带水淘进去拌了吃，饭菜一道下；当然，也可以直接切好小青菜咸肉丝香菇丝烧一镬菜泡饭；假使有得半焦半香个饭【锅巴】，水烧开仔拿饭摆到镬子里笃到米粒子散开，就是来得个好吃个锅香泡饭——搿个叫呒没定规，丰富多彩。

　　泡饭也叫饭泡粥、泡粥、淘汤饭、汤淘饭，用隔夜个冷饭加烧开个自来水，是能够几分钟就做好个沪式快餐。老早仔一早来勿及垃煤球炉浪烧开水，有个人家直接到老虎灶去泡仔开水回来冲泡饭，伊适应了上海人快节奏个生活，体现了上海人善于变通勿受拘束个特点，也印证了上海人勿尚奢华讲究生活实际自得其乐个开明心态。

　　烧泡饭一定要等水先滚开，否则忒烂，水一般要比冷饭多放两份，钢盅锅子搪瓷煲侪好烧个，假使底里大个镬子受热面宽，热起来快，煤气就省。冷饭放下去顶好用勺子压牢饭块借了热水个力道拿饭揿揿散，让米粒子勿再粘拉一道。想吃薄点个，水就加了大一眼；想吃厚一眼个，葛末就少加点水或者拨伊垃镬子里多涨眼辰光。等到饭垃水里“迪粒拔辣”起泡烧开了，马上就拿灶火关脱，泡饭就烧好了。寒场【冬季】里盖头勿要开开来个，隔段辰光吃仍旧暖个。假使一歇歇就要吃，葛末侬拿伊盛垃碗里让伊跑脱热气，也可以【xiao掀】开镬盖让伊勿要太烫，或者垃水斗里放眼冷水，拿镬子浸垃水里快速冷冷伊。假使侬实在急了要吃仔去上班，还有个办法可以让泡饭勿烫，就是准备好冷开水或者放垃冰箱里个隔夜菜个汤淘垃泡饭浪，葛末勿冷勿热味道也勿推扳。

　　冷天介吃仔泡饭人暖热，夏场里白开水茶淘饭顶爽气。泡饭一吃，一夜天少脱个水分又补回来了；咸小菜一嚼，淡之刮答个嘴巴里向又有了滋味；泡饭吃好，肚皮填饱，一上半日力道勿少。告咾泡饭尽管简简单单咾平平常常，阿拉还是日日早浪吃来吃去吃勿惹厌。