上海人讲横东道，就是打赌。赌一把，就是横一记。横东道是上海话大词典里个写法。上海闲话是讲讲便当，写写就大伤脑筋了。上海人讲到横，还有点像旺个发音。所以交关老上海人来看上海闲话写个文章常常感到蛮吃力个。一个好办法是一面看报、一面读起来、读出来。搿样可以省力省心一点。试试看，灵光？

　　小辰光到弄堂里去白相，男小囡是最喜欢来横东道个。啥人奔得最快？横一记。啥人有本事翻过墙头，也横一记。输脱个人要付出代价，要么是几张香烟牌子，要么是一根断棒冰。赢个人是做大王来享受胜利果实。大人之间也有来横东道个。一个话题大家争勿清爽，大家勿卖账就可以横东道了。上海队打北京队进了几只球，苏联人几时卫星上了天，小绍兴三黄鸡几钿一斤，啥个事体都可以拿过来横一记。大人个赌注常常是一顿饭局，输脱个朋友请埋单。小来来是一包香烟，红牡丹或者大前门，蹩脚香烟勿挨。输了要耍赖皮个人要拨大家骂山门：“侬是赖极皮！赖得脱今朝赖勿脱明早！”勿管小囡、大人，拨人家打成赖极皮是老老坍台个事体。赖极皮个顶峰是极哭皮。一门心思要想赖帐、赖到哭出来软化别人，搿大概是极哭皮个出典吧。经常想出花头经来骗别人横东道、来多多少少占点小便宜个家伙，上海人称之为老刮铲。一镬白米饭分光了，还可以辣镬子里又刮又铲盛出半碗饭来个脚色，老刮铲是也。因此上海人还以老刮铲来形容小气鬼、刮皮鬼、吝啬鬼。“小浦东最最反对聚餐来AA制。但是伊从来就呒没会过一趟钞，一钿勿出。真是一个老刮铲！”赖极皮、极哭皮、老刮铲还算是放得到场面上讲法。最俗气也最粗气个上海闲话是讲老屁眼。老屁眼指精明无以复加、老练过人一筹个大好佬。搿样子个朋友，伊身边往往是呒没几个朋友个。大家搭伊呒搭头。

　　老底仔上海人生活个空间小，大家轧辣一条弄堂里、孵辣一只门牌号头里。所以攀谈多、讲张多，横东道个故事也就多了去。现在上海人住房条件改善了，邻里之间个距离宽了、间隔大了。一道茄山河机会少脱交关。横东道因此也冷脱了。由横东道引出来个赖极皮、极哭皮也等量递减。更加年轻个上海小朋友假使有了争论，只需摸出手机点点戳戳，立马有解。用勿着横东道、横一记哉。打赌已经落后了、落伍了。搿个可以算是时代进步个小脚印。呵呵。