大伏天，热得走油，邪气后悔呒没辣拉灶头间装只空调。烧点小菜，面孔浪个汗滴答滴答挂下来。我菜刀一摆，立时三刻，迓到空调间里，嘴巴里还叫：热煞了、热煞了。先生一听就讲，又要药胡翅叫啦，老里八早呒没空调勿要过日脚了。

　　先生个闲话冷陌生头让我眼门前出现了一幅幅小辰光过热天个样子，最后定格辣大沪冷库门口。

　　阿拉威海路张家花园大门口，靠近吴江路，有一只大沪冷库。听人家讲，搿只冷库老早就辣海了。门面是勿好看个，灰托托个水门汀墙头，样子方方正正呒没一点噱头。冷库门口头总是湿得一塌糊涂，脚也踏勿落，勿管是冷天还是热天，门口头总归有三三两两穿了老棉袄、大靴子个工人，有点像穿得海噗噗个宇宙服航天员。伊拉靠辣墙壁吃香烟，听讲是出来透透气。冷库里向冷得勿得了，里向侪是冰肉、冰鱼、冰冷饮咾啥。上世纪60年代上影厂电影《大李、小李与老李》就拿冷库作背景，里向个老李为了逃避体育活动，勿当心拨关进冷库，一歇歇就冰得像石刮挺硬个半爿猪猡了。

　　不过，阿拉小辰光欢喜到搿搭去白相，伊是阿拉童年个清凉乐园。伊个辰光屋里向呒没空调，电风扇也勿是家家人家有个。冷库是个大冰窟，里向透出个丝丝冷气源源勿断，温度起码比火热踏踏滚个外面低八度。阿拉一群小囡放暑假侪欢喜到伊个门口去白相，揩点油，孵“空调”，适意得不得了，好像额角头浪向个痱子也瀴下去交关。冷库门口大卡车一天到夜辣卸冰块，冰块有现在一只小型旅行箱子介大。工人七手八脚用一只长长个铁钩子拉牢仔冰，一块一块拖下来，拖到冷库里。等车子开脱了，阿拉小姑娘侪蹦蹦跳跳跑过去，侬抢我夺拣地浪向落脱个碎冰，摆辣手里白相。一歇歇放辣额角头浪，一歇歇贴辣面孔浪，一歇歇放辣胸口头，阴凉啊。同班个男小囡就更加扎劲了，伊拉胆子大，赤仔膊一直辣搿搭混，跟门口个老师傅搞得老熟，有辰光揩油吃两根断脱棒头个赤豆棒冰。有辰光还有想勿到个惊喜。从小头子活络个大洪搭仔冬冬，现在回想起伊个辰光来，还是绝对得意个讲，大卡车运来鱼、肉、猪下水咾啥，进库冷藏辰光，有时会落辣地浪向一眼眼，门房间老师傅一开心，会甩一块猪肝或者两只腰子拨阿拉，“小鬼，喏，拿去。”穿仔木拖板个伊拉，眯花眼笑个捧仔搿点物事，劈里啪啦奔回去，搿点腰子、猪肝就成了伊拉回屋里向卖样个“战利品”了。

　　上世纪九十年代初，大沪冷库拆掉了，代之而起是高楼大厦。当然，阿拉个下一代也勿用去揩搿种油了，屋里向就是一个清凉世界。今年7月1日，周家嘴路军工路路口远东地区最大个冷库也关停了。

　　上海滩一道风景永远消失了。