黄梅天是交关上海人感到讨惹厌个日脚。天气是一歇歇晴、一歇歇雨。气温是一歇歇热、一歇歇瀴。气压低、湿度高。是吼势天，是殟塞天。屋里向是潮几几。灶头间是湿搭搭。汏出一堆衣裳是呒没几分钟可以晾到外面去晒干个。太阳变成钟点工，三天、五天不肯出工来上班。阴势天个湿衣裳是收进收出、搁进搁出，忙煞人。上海闲话里讲干，简单，干乎乎、干卜卜。衣裳晒干了，干乎乎。蛋糕勿新鲜了，干卜卜。上海人要来形容湿，闲话一串。有一点点湿，是潮搭搭，是潮几几。湿得结棍了，是湿搭搭，是湿塔塔。水分更加多，是湿漉漉，是湿淋淋。是湿非湿，是湿滋滋，是湿西西。以方言学者个介绍，潮几几、湿搭搭是为ABB式。平常上海人呒没搿样子考究来研究上海闲话。反正是表白意思，脱口而出，大家听得懂、拎得清就可以了。

　　上海人以ABB来攀谈讲张，是加重形容个程度。比方讲热，有热呼呼，有热烔烔，有热吼吼，有热辣辣。讲冷，有冷丝丝，有冷飕飕，有冷冰冰，有冷笃笃。表示亮，有亮光光，有亮堂堂，有亮晶晶。表示暗，有暗黜黜，有暗蒙蒙，有暗洞洞。介绍形状，有长条条、长端端、长腰腰，有短悠悠、短促促、矮墩墩，有圆滚滚、有方笃笃、有扁塌塌、有直别别。辨别味道，有甜味味、甜滋滋，有酸几几、酸滋滋，有苦搭搭、苦几几，有辣蓬蓬、辣豁豁。ABB式，是形容程度的中低档子，只好算是上海闲话里个中级职称。最高级别个比喻与形容，是BBA式，是上海闲话强调形容程度个高级职称。黑到底了，是墨墨黑。亮到顶了，是锃锃亮。热是呼呼烫，冷是冰冰瀴。大是野野大。小是咪咪小。硬是绷绷硬。老是石石老。嫩是习习嫩。滑是的的滑。碎是粉粉碎。光是精精光。满是拍拍满。人是索索抖。心是别别跳。上海闲话个生动与丰满辣上海滑稽戏里是得到充分个发扬光大。老上海人欢喜看滑稽戏也因为要辣平常个生活中，搿样子个上海闲话毕竟还是讲得勿多、用得勿广个。老早是到戏院里去、现在是辣电视里来过过老上海闲话个瘾头。大家开心一场。年纪小一点个上海人，到上海来生活勿长个新上海人，上海闲话里个ABB式和BBA式是讲勿出多少个。上海闲话托福更加推扳一点个，是对搿点闲话连听都听勿懂了。对上海人来讲，普通话推广个任务完成得好好叫好哉。上海闲话也可以推广推广了。慢慢叫，勿来三哉。