我问伊拉：“为啥要学讲上海话？”伊拉讲，垃上海工作、生活，会讲上海话，搭邻舍隔壁、办公室同事当中个上海人交往起来觉得特别亲切，感情老容易贴辣一道个。还有学员讲，自家出去办事体、谈生意咾啥，碰着对方是上海人，搿个辰光自家要是会讲上海话，葛末交谈起来关系特别容易拉近个。总之，就是大家侪想快点融进上海文化当中来。 

　　记得几年前，一家美国电台打电话采访我，对我讲现在个小囡侪讲勿来上海话了，廿年之后，上海话要消失了。我讲，廿年后恐怕我还呒没死，我会讲个。语言是文化个载体，地域方言是地域文化个载体。假使上海话消失了，上海个特色文化也就消失了。譬方讲，沪剧、浦东说书、上海民歌咾啥侪从此完结，总勿见得用普通话去唱咾！上海人个生活方式也要消亡。搿种事体可能发生 ？上海人会心甘情愿 ？讲方言会让使用该种方言个人之间产生亲和感搭认同感。所以新上海人想学上海话，了解上海文化，进一步融进上海文化，搿个是老自然个事体。 

　　另外，会讲上海话还有一种好处，就是有利于学习外语。原来辣汉语各方言中，只有吴方言具有一套全浊辅音声母，上海话是吴方言区个代表方言，其他方言区侪缺少全浊辅音。譬如“背”、“备”两字，普通话是同音的，都读bèi，但是辣上海话当中，“背”个声母是b，“备”个声母是bh。上海人会发bh[b]、dh[d]、gh[g]、fh[v]、sh[z]（括号里注个是国际音标）等等浊辅音，其他方言区个人就觉得困难。辣欧洲语言、日语咾啥外语当中，也有浊辅音，上海人学起来就比较容易。 

　　几年前，我碰到香港语文学会主席姚德怀先生，我用广州话搭伊讲闲话，结果我发现伊讲个广州话带外地腔。伊搭我讲，伊是宁波人，到香港个辰光已经是大人了，人辣十二岁之前假使只会讲一种闲话，葛末超过十二岁，学任何闲话侪会带自家母语个腔，音勿容易发准了。我想，上海为啥有讲苏北腔、广东腔个上海话呢？原因就是讲带腔上海话个人到上海定居个辰光已经超过十二岁了，而伊拉个子女勿带别个腔，就是伊拉辣小学里就学会上海话。 

　　所以，我建议新上海人应当让自家个小囡早点学会上海话，勿要超过十二岁。上海本地个小囡除了会讲上海话外，顶好拿普通话学好，有条件个闲话，再学一种方言，葛末，大起来就会发比较多个音了。

　　文/阮恒辉