上海中心区域有个普陀区（地级），浙江舟山市也有个普陀区（县级），哪能会得介巧两个地方侪叫普陀区呢?舟山个普陀得名垃前头，上海个普陀得名垃后头，所以要讲清爽迭个问题，还要先从舟山个普陀区讲起。 

　　伊个地方本生【sang，本来】叫普陀县，县城垃拉沈家门，叫普陀县是因为县域里向有座普陀山。普陀山是中国佛教个四大名山之一，也是南海观音菩萨个道场。普陀山个名字搭仔观音菩萨是有关系个。 

　　观音菩萨是西方极乐世界阿弥陀佛个左胁侍，伊垃拉印度南部个普陀洛伽山（Pota1aKa）成道修行，民间也叫伊观音娘娘。唐朝大中（847-860）年间，有一个天竺（唐朝时印度称作“天竺”）来个和尚讲，伊亲眼看见观音菩萨垃拉东海一个小岛浪向显灵说法，后来迭个小岛就取“普陀洛伽”个前头两个字叫“普陀山”，一直叫到现在。 

　　清朝光绪八年（1882年），普陀山和尚慧根要到印度去拜佛，伊路过缅甸个辰光，请到五尊玉雕个释迦牟尼佛像，回国路浪向经过上海，留下来坐佛卧佛玉雕佛像各一尊。为了供奉迭个两尊玉雕佛像，光绪廿六年（1900年），慧根和尚特为【特地】垃拉江湾车站附近造了一座佛寺，取名玉佛寺，伊自家任第一任住持，可惜迭个寺建成呒没几化【多少】辰光慧根和尚就圆寂了，后来江湾玉佛寺垃拉辛亥革命辰光个战火当中也损毁了。现在垃拉安远路个玉佛寺是1918年由可成和尚筹建个，1928年建成后改称玉佛禅寺。 

　　伊个辰光上海还勿像现在介闹猛，沪西安远路一带还呒没成市，完全是乡下头个样子。玉佛寺建成以后，香火蛮兴旺个，外头也开始闹猛起来，周边慢慢叫形成了闹市。当时个上海市政当局因为普陀山慧根和尚首建玉佛寺个缘故，就拿玉佛寺所在个区命名为普陀区，搿能一来，上海就有了自家个普陀区，搭浙江个普陀县是勿搭界个。 

　　1926年，垃拉公共租界老勃生路(今长寿路)、小沙渡路(今西康路)交叉口个道路中央，造起一座钟塔，大家叫伊“大自鸣钟”，其实伊个本名叫“川村纪念计时塔”，是日本资本家为纪念川村利兵卫(就是枪杀故正红个日本人)而造个一座塔钟。当时垃拉沪西地区属于第一高层，站垃塔顶遥望苏州河，所有的纱厂一览无余。普陀区大自鸣钟于1959年8月拆脱。