黄梅天到了，勿能下田。阿拉农场职工个个认为好，乃末可以垃拉宿舍里睏觉、看书、茄山河了。我早有打算，拿出囥拉床底下头个鱼网，出门去。室友问：“侬做啥去呀！外头介大雨。”我笑笑搭伊讲，弄点吃个去。悠悠天下事，吃为先。所谓鱼网，老简单个。就像是镂空个麻袋，麻袋口用一根竹头弧形撑开，缚一根绳子，人跳进河里，绳子绑拉腰浪，网垃拉身后拖拉海。人垃拉河当中央走，碰到水深个地方，还得脚勿踮河底游泳，拉动鱼网，像牵引车。后来我再晓得，迭种鱼网叫沪，是上海滩浪特有个，我一记头觉着自家老伟大噢，介早就能拿一个叫作沪个家伙拖垃拉河浜里捞鱼哟！

　　雨是勿肯停个，我戴了一顶草帽，走垃拉水当中央。河比雨更叫水，草帽只是做个样子，可能我当时还考虑到万一落垃拉河浜里，也算是做个记号。想想自己曾是少体校学游泳出身个，勿怕。