垃拉三年自然灾害辰光，上海市区每家人家发一张“副食品供应卡”，阿拉上海人侪叫伊“小菜卡”，用场勿要忒多噢。每日每人二两蔬菜，每十天每人四分洋钿豆制品（有豆腐、豆腐干、麻糊、湿线粉、烤麸、油面筋任选），每户一斤鸡蛋；逢年过节“小菜卡”买趟鱼，还有大小户、花色与一般个区别。后来“小菜卡”个用场越来越多：热天买西瓜、皮皂、盐、自来水、香烟……好比现在个银行信用卡，“一卡在手，走遍市场”。 

　　有一趟我四点半爬起来到菜场去排队买小菜，跑到一看，垃我前头已经交关人立辣海了，有用破篮头、碎砖头代人排队个。五点半铃响开秤，老早就等勿及个人一嗡而上，轧到前头抢购，轧扁篮头、踏脱鞋子、落脱手套个样啥侪有。偏偏我最最倒霉，拿“小菜卡”落脱了，这真要命了！“小菜卡”呒没了，一家门断了大半个号头个蔬菜、蛋、豆制品来路。呒没小菜，哪能吃饭？我阿爸当时生严重个糖尿病，特别要用蔬菜、豆制品代替米面等主食，防止血糖升高而昏迷；姆妈因脑充血瘫痪辣辣床浪向好几年，呒没蔬菜吃，大便拆勿出，真要出人性命，哪能办？叫我愁煞。辣拉南汇教书个阿姐请住辣农村个学生帮忙，用高价买来伊拉自留地浪种出来个蔬菜、瓜果搭仔田鸡、河鲫鱼等转来，拨屋里向开荤；远辣千里之外北京个三阿姐寄来了从伊副食本上购买个黄豆粉（可冲豆浆、代豆腐），拨阿伯补充营养。乃末总算熬过呒没“小菜卡”个苦日脚。 

　　“小菜卡”老早就完成了伊个历史使命，现在伊已经成为收藏家个宝贝，邪气吃价。