对大部分老上海人来讲，除了谈情说爱或者商讨点事体再去咖啡馆以外，一般性来讲，大家还是欢喜孵辣屋里向吃咖啡，又经济又写意。从前上海有句称赞家主婆能干个闲话：“我太太烧得一手好菜。”搿句闲话到了一些洋派人个屋里向，往往会变成“我太太烧得一手好咖啡”。随着咖啡文化融入老上海个上流社会生活，洋派人家个囡儿嫁妆中必有一套精致个英国骨瓷茶具搭一把咖啡壶。

　　讲到咖啡壶真是花头经杂多。但我还是最欢喜传统个、壶盖浪戴辣玻璃球个老式咖啡壶。常庄听年轻人抱怨，一天勿吃杯咖啡魂灵头就回勿转。我想对伊拉小青年讲，搿个只能算无病呻吟，根本勿能算咖啡瘾。对伊拉来讲，咖啡只是显示生活质量个标签。真正个咖啡瘾发作起来，根本勿是魂灵头回勿回来个问题，而是像鸦片瘾头发作一样，总会千方百计、勿惜代价。听老人讲，上海沦陷后，与外界运输中断，市面浪再也呒没咖啡进口，全靠战前囤积个余库度日，所以上海咖啡馆仍旧开得闹闹猛猛。当然一部分是靠黑市进货，据讲侪掌握辣犹太人手里，也有勿少是用炒焦个大麦代替。咖啡老枪们心里明白，有勿有咖啡已勿是忒要紧，要紧个是吃咖啡个整个过程、氛围搭仔心理。与醉翁之意勿在酒颇有异曲同工之处。

　　“文革”中，原大中华橡胶厂老板全家扫地出门，住辣辣我屋里附近个一只汽车间里，全家靠一人一月十八块生活费过日脚，每逢从伊拉汽车间里飘出咖啡香，就晓得是伊拉领生活费个日脚。伊拉拿到生活费，勿是先去买米，而是先去买咖啡。我先生个外公——上海出名个绿房子个主人吴同文，“文革”中搭姨太太双双携手共赴黄泉，也选择了咖啡——用咖啡（姨太太是公认个烧咖啡个好手）送服安眠药。一壶又香又浓滚滚烫个咖啡，是伊拉对人生最后个一点依恋。“文革”中我屋里当然也勿能幸免，但饭后咖啡还是勿断。咖啡壶拨拉伊拉抄脱了，婆婆就用纱布做了一只袋袋，拿抳碎个咖啡摆辣袋里，乃末放入牛奶锅里烧，一样香浓。因为咖啡杯也抄脱了，就倒辣饭碗里吃。我先生还开玩笑，迭个勿像辣辣吃咖啡，赛过像辣辣喝中药，真叫是苦中作乐，苦中有甜。阿拉个宗旨是，明朝个事体明朝再讲，今朝该哪能过还是应该哪能过。比如每日合家夜饭后能够围桌吃一杯咖啡，已是不幸中个大幸！

　　我有一位法国留学生出身个姑父，是译文出版社个法文翻译，即使“文革”中，伊吃咖啡还一定要坚持一套程序，也就是讲要有一套吃咖啡个腔调。哪怕杯盘勿成套，伊也要坚持杯是杯、碟是碟、糖罐是糖罐。杯子先要用滚水烫过以后保证热咖啡注入后勿会降低温度。喝咖啡一定要伴以炼乳搭方糖，即使后来有了咖啡伴侣了，伊还是坚持用炼乳，以保证口感香醇。曾问过为啥要用方糖，伊讲迭个是规矩，呒没啥个“为什么”。有人觉得喝杯咖啡何必介繁琐，姑父就会讲，做人就是一个烦字，否则有啥意思。现在有了一定人生经验，想想搿句闲话充满哲理。人生享受个勿是一个结果，而是一个过程。吃咖啡也体现了同样个道理。

　　现在生活节奏繁忙，闲时勿多，大家拿了个大马克杯，稀里糊涂个拿咖啡送下肚皮，啥地方还谈得上品位搭回味？还有咖啡机，厾几只硬币下去，咖啡就哗哗哗个出来了，赛过百货公司里同一款式个批量服装，觉着呒没特别个性搭口味了。