上海滩个公园里，复兴公园算得上是老寿星，一百多岁了。伊建造于1909年，原先叫顾家宅公园。后来因为坐落辣旧时个法租界，公园又是按法式园林来修建个，老上海人就称伊为法国公园了。尽管伊从来就没有掛过牌子称自家为法国公园。1944年，伊改名为大兴公园。到了1946年，伊又改名为复兴公园。从此以后就一直坐不改姓、立不更名了。复兴公园南大门辣复兴路、重庆路口。北大门通雁荡路。以后又辣西面开了一扇侧门通皋兰路。现在看看复兴公园只好算一只小公园，占地不到8万平方米。但在当时复兴公园也坐得上市区里大公园个交椅了。公园里个南北大道是一条林荫路。一块大草坪相当于一只大个足球场。还堆出了一丘假山，僻出一潭湖水，造出一圈沉床花坛，修出一座玫瑰花园。麻雀虽小，五脏俱全。公园里最吃价个是树立着勿勿少少个悬铃木，上海人俗称其为法国梧桐。其中最大个梧桐，要两三个大人才围得上。树龄最长个已有120岁哉。孵辣大树下面晒晒太阳个老伯伯、老太太比起这点树爷爷只好算是小阿弟、小阿妹了。廿多年前革命传统也走进了复兴公园，公园里靠北面个上海科学馆一侧安置了马克思、恩格斯个花岗石立像。搿尊几人高个雕塑是由沪上著名个雕塑家章永浩创作个。遇上传统节日，就有红领巾、共青团员们来敬献鲜花。要辣平日里，此地就是大家唱个舞台，红色老歌一曲又一曲，大家要唱得尽兴才收摊。

　　现在个公园勿再是儿童乐园，而是老人个天地。辣公园里，百步之内必有跳舞个圈子、唱歌个行列、打拳个团队。侬来蓬嚓嚓，伊来哆来咪，我来一二三。大家白相，相安无事。六十多岁个还摸勿出敬老卡，只好算小小囡。七十多岁个也只好算中年人，只有到了八、九十岁才可以轮得上来摆摆老资格、讲讲老闲话。凡是想体会自家还够年轻个朋友可以到复兴公园里去走一圈。保证辣侬走出公园以后勿敢再倚老卖老。老，离开阿拉40后、50后还老远老远了。

　　复兴公园是一面魔镜，对老上海人而言。爬上假山，侬记起了儿时个官兵捉强盗。坐进玫瑰园，侬想到了青春时代个谈恋爱。躺辣大草坪上，侬看到了侬当年小家庭个假日野餐。辰光到阿里搭去了？不妨，侬到侬附近个公园里去寻寻吧。一定寻得到个。