上海早期个烟纸店，伊个功用就等同于现在个便利店。烟纸店辣拉上海生存了上百年，深受老百姓欢迎。烟纸店带拨了老百姓老多方便，其中特点之一就是零拷。零拷，实际上就是零打碎敲（拷），很能反映当时年代上海人个精打细算。埃个辰光，上海人经济条件普遍勿大好，屋里向地方勿大，还呒没冰箱，勿可能像今朝一样，一记头拿一个礼拜个物事买回来，于是零拷成了家家人家个普遍现象。比方讲，烧夜饭了，正好需要黄酒做作料，就差小囡到烟纸店去买5分洋钿黄酒。勿要小看迭眼黄酒，除了做作料，多下来，正好可以拨男人吃一顿。

　　零拷学问老多。我辣烟纸店做过3年学徒，也算吃过萝卜干饭。眯眯大【狭小】个店堂间，堆放了十几坛老酒，除了黄酒，白酒系列有50度土烧/0.90, 55度/1.10 ,60度/1.20；还有以优质白酒为酒基，配以红参、当归等中药材浸泡，制出个酒颜色像绿豆汤个绿豆烧；以高粱酒为酒基，加入五加皮、杜仲等浸泡个五加皮，搿些酒交关受老百姓欢迎。比较高档个濉溪大曲，零拷1.60，算吃价钿了，当时茅台才8元1瓶！老酒个零拷是用吊提，所谓吊提，就是一种大小勿一个固定容器，有一个长长个固定个柄，吊提算得上伟大个发明，零拷是要拿液体倒进瓶口老小个酒瓶，是老勿容易个事体。有了吊提，再加上漏斗，就很方便了。有眼老上海称零拷为零吊就是搿能来个。吊提有锡个、竹头个，规格有半两、1两、2两，搿能就可以搭配勿同个斤量。由于比重勿同，黄酒、白酒个吊提勿一样，勿可以互相通用，以保证份量准足。记得我第一次替店隔壁弄堂里个一个熟客零拷2两五加皮，埃个熟客带了玻璃杯，熟客掼了一支香烟拨店里个老师傅，然后两家头就茄山河了。我拿起2两个锡吊提，按照“拷酒要快，拷油要慢”个诀窍，抖抖豁豁将酒灌进了玻璃杯，拷完还老道地个用揩布拿杯子揩清爽后再递拨了熟客。迭个熟客见了摇摇头：“小阿弟，份量勿准足啊！”师傅随即加了点，熟客心满意足个走了。看我丈二和尚摸勿着头脑个样子，师傅说：“搿些人是老酒鬼，老酒鬼个玻璃杯有花纹个，2两酒到啥个花纹，伊拉眼睛一瞄就晓得了，对酒鬼来讲，一眼眼老酒都勿好推扳个！”师傅还关照，锡吊提拷酒要当心，因为容易碰出“瘪塘”，有了“瘪塘”份量就勿准足了，告咾要经常校吊提，生意人最讲究信誉。

　　辣烟纸店里可以零拷个，除了老酒，酱油、豆油，还有雪花膏、百雀羚都可以零拷。烟纸店个最大功能就是便民，香烟可以零卖，连上厕所用个手纸、写信个信纸、缝补衣服个针线都可以零卖，搿些是另外一种零拷形式了。