现在个糖垃拉古代叫做“饧”，是指用粮食糖化后做个饴糖。一直到1883年英商太古洋行垃拉香港开办个太古糖房，用甘蔗生产白砂糖。一直到现在，大家还拿糖叫做“太古糖”。

　　有了砂糖就可以做糖果了。旧上海有交关糖果厂，有名气个“沙利文”、“马宝山”，迭个两爿后来合并，就是益民食品四厂，还有天明糖果厂生产个“桉叶糖”，吃咳嗽特别灵光。果糖根据配料工艺可以做出勿同个品种，名气比较响个有“太妃糖”、“牛轧糖”，伊拉是英文toffee、nougat个音译词。中国人自家研究生产一种“牛皮糖”，因为糖里向含有猪油成分，吃口特别韧，有弹性，黏度强，后来上海人就拿有种纠缠不清个人叫做“迭个人像牛皮糖一样”。我小辰光顶顶欢喜吃一种叫“米老鼠”个奶糖，吃起来有一股特别浓个奶香味道，由于“米老鼠”是美国“迪士尼”个专利，垃拉上个世纪70年代初中美建交前，中国人就拿“米老鼠”改为“大白兔”。据讲，1972年美国总统访问中国，垃拉上海发表《中美上海公报》以后，周恩来总理还拿“大白兔”奶糖当作礼品送拨拉尼克松总统呢。