讲拨侬听恐怕侬也勿会相信，阿拉小辰光从徐家汇屋里向出发，到外滩去白相，侪是靠11路电车。啥叫11路电车？就是自家个两只脚。迭个辰光，徐家汇只有一部2路有轨电车，叮叮当当从徐家汇经过淮海中路，穿过金陵东路，末脚到仔外滩十六铺。

　　开始辰光，阿拉勿认得路，只晓得跟仔2路有轨电车屁股后面跑。淮海路浪交关闹猛，一爿爿商店门面花花绿绿邪气 ，一路走一路看，也勿觉着厌气。垃拉金陵东路两旁侪是廊楼，太阳晒勿着，落雨也淋勿着，走走蛮适意。走到金陵东路头里向，外滩就辣眼门前了。金陵东路1号，是卖船票个。沿海到宁波、定海、温州去，内河到汉口、重庆、九江、南通去，船票侪垃迭个地方买。每年春节排队买船票，轧得一塌糊涂。阿拉有辰光买好船票后，顺带便侪要到外滩兜一兜。穿过中山东路，立辣外滩防护堤旁边，只看见江面浪一歇歇有艘大轮船开过来，一歇歇有只小火轮搭仔驳船，像拖着一串大闸蟹，突突突开过去。几只薤白个江鸥也辣江面浪向飞上飞下轧闹猛。阿拉年纪小，只晓得日里向外滩好白相，后来人长大了，方才晓得外滩夜景更加 ：除脱江面开过个轮船灯火辉煌，活脱似一幢幢移动个水晶宫，江堤旁边一对对男男女女多得像插蜡烛。嘻嘻，侪辣轧朋友。侬或许要问，徐家汇到外滩老远老远，明明有电车可以乘，做啥要跑路？阿拉勿怕退招势，实在是为了节省两张钞票，一来一去三角洋钿车票，可以买二斤大米了。迭个辰光，力气勿稀奇，稀奇个是钞票。爷娘赚得少，阿拉去外滩白相，开勿出口讨车钿，只好辛苦两只脚了。

　　辰光长了门槛学精了，晓得抄近路到外滩去白相。后来，2路电车改道了，从卢家湾到十六铺。阿拉勿像过去介笨，跟牢电车绕圈子，多跑冤枉路。阿拉先从肇嘉浜路走到打浦桥，经过卢家湾，穿过斜桥，再从南市老西门搭仔人民路跑到外滩。迭个抄近路门槛是跟踏三轮车工人学来个。阿拉爹爹带仔阿拉从乡下乘轮船到仔上海十六铺码头以后，碰巧夜里向呒没电车了，或者行李重，就叫三轮车。阿拉小辰光到外滩去白相，去看大轮船，靠个是11路电车，虽然跑得邪气吃力，现在想想，也是蛮扎劲个。