搿个辰光辣五十年代，一进弄堂旁边勿远个食品小店，我个小眼睛就勿由得盯牢了搿一排排个糖罐头。搿个是一个个长方形个大玻璃瓶，每个瓶面对辣顾客个是方形个底部，我看到个是瓶里排得整整齐齐个长方形个糖果，除了什锦糖果是散摆个以取五光十色以外，每个瓶子里侪是一种糖，一粒粒安排得介细心齐整，足见一个时代个认真。一只只瓶横排辣架子浪向，上下可以排好几排，五颜六色，气象万千。作兴是出于幼小心灵对糖果个神往，每趟吃了糖果以后，还舍勿得拿糖纸头掼脱，择其佳者让伊拉舒舒服服个躺辣我用过个课本里，每一页夹一对。搿点糖纸头，居然也因为夹辣课本里咾囥过了“文革”，闯过了发大水告几趟搬场，保存了五六本。到七八十年代，再由我个囡儿编下去。现在再翻翻搿点糖纸头，每一张侪是一个甜蜜个回忆。