小辰光过中秋节，真个是芋艿天下：早饭汤芋艿，午菜炒芋艿，点心是芋艿，零食还是芋艿，祭月供神仍旧用芋艿。

　　农历七八月间，陈粮告罄，新谷灌浆，青黄勿接，芋艿成熟。芋艿像一座横跨两岸个桥梁，拿两段生活维系起来。“莫诮蹲鸱少风味，赖渠撑得过凶年。”垃拉艰难岁月里，芋艿实在是伲个救命王菩萨。搿一年我奶奶种仔一亩水芋。芋艿有旱芋、水芋之分，水芋种拉水田里，肉质细白粘糯，味道胜过旱芋，但勿耐饥，对一年生活有八九成把握个人家方才去种水芋。到仔中秋，祭过月亮婆婆，家家搬出小枱子，摆上一大盆芋艿，围坐拉打谷场浪，一面剥芋艿一面东搭黄浦西搭海个讲张。讲究一点个人家，还配一把茶壶几只粗瓷碗搭仔一大碗咸水毛豆。毛豆三四粒一排，粒粒饱鼓鼓，像要撑破豆壳，同水芋一搭配，就显示出主人个经济实力搭种田本事。搿种辰光，随便啥人走过，认得或者勿认得，侪可以坐下来吃个够。芋香醇醇浓浓，充满平常人家过日脚个人情味道。倒是迓【ya】拉垃屋里向吃月饼个有铜钿人家显得孤孤单单，呒没一眼生气。伲小囡掇【dek】仔矮凳，从迭家转到伊家，有铜钿人家小囡也偷偷溜出来，同伲一道吃完迭家吃伊家。村浪有个着长衫个先生，平常虽讲拉垃城里教书，却常常看到伊拉垃村里闲荡。搿一天伊成了大家个贵客，勿分水芋旱芋，满嘴讲“好吃”，人情味勿会因为贵贱尊卑而变味道。碰到伊高兴，会脱伲讲一段故事。伊讲，抗倭英雄戚继光率军驻扎辣山上，拨拉偷偷摸上来个倭寇包围，粮草断绝，牺牲仔交关将士。后来士兵挖到一种野菜根，饱餐一顿，打败倭寇。为纪念迭场战争，戚继光拿迭种野菜取名“遇难”。后来大家根据谐音写成“芋艿”。长衫先生个故事让伲邪气向往英雄。（编者注：这是后人附会的故事，听来有意义，但并非“芋艿”此词的来源，“遇”声母是“疑【ni】”,“芋”声母为“云【yhi】”，“难”韵母带鼻音，“艿”无鼻音且读【a】。古音、吴音都不谐音。）搿一天真个是伲小囡个节日。

　　不过搿一年奶奶种个水芋，我一粒也呒没吃到。东洋飞机厾【dok】炸弹，炸煞仔邻村农妇，炸伤仔田里耕牛，奶奶种个水芋炸得精光。八月中秋，大家清理断垣残壁，收捉【zok】枯枝败叶堆辣一道，生了火。伲小囡拎仔小竹篮，到地里挖来芋头，围仔火堆朝里烘。芋头干瘪瘦小，多数烧成仔灰，少量个慢慢烘熟哉，空气中弥漫芋香。饥饿让伲忘记炸弹个恐怖，挖出烘熟个芋头，双手倒换吹气。长衫先生十指沾满芋皮，满嘴芋艿喷香，含含糊糊咏诗：“深夜一炉火，浑家团圞坐，煨得芋头熟，天子不如我。”咏罢大笑。现在阿拉再勿吃烘芋头哉，勿过，每到中秋，我总是怀念烘芋头个浓郁香味，怀念飘洒拉芋香当中个浓郁人情味。

　　本文沪语精选

　　讲张  迓【ya】  厾【dok】炸弹  收捉【zok】