我伲中国人对过中秋节还是蛮当桩事体个。因为中秋节是团圆个节日，也是临近秋收个日脚，搿段辰光，天高气爽，丹桂飘香，气候邪气宜人。古代就有中秋之夜焚香拜月，祝告月神，祈求保佑个民间习俗。而我伲上海搭苏南一带过中秋，有勿少独特而有趣个习俗。

　　以前过中秋，除脱吃月饼，还有交关时令食品，譬如糖芋艿、糖炒栗子、白果、水红菱、嫩塘藕、石榴、柿子等等。迭个一日全家还要吃团圆夜饭，跟现在过中秋个情况相差勿多。还有一样物事小囡邪气喜欢，就是香斗。香斗是用线香编成一个像盛米个斗迭能个物事，小个五六寸见方，大个有一尺多见方。香斗里填满木屑之类个物事，当中插上一根柱子，柱子上方，用彩色纸张头扎成一个月宫，柱子浪插一眼纸扎个人物，还插上几面三角形或长方形个五颜六色纸头做个旗子，形状蛮像京戏舞台浪武生肩胛浪插个靠旗。辣香斗里点上线香，一般人家会辣海长桌浪点上蜡烛，供上香斗，迭个叫做“斋月宫”。蜡烛跟线香从上半日一直要点到半夜里。等香烛点光，大人会捧了香斗到院子或天井里，辣辣月光下头拿伊焚烧，迭个叫“烧香斗”。迭个辰光，小鬼头会拿香斗浪纸旗拿下来插辣自己衣领里，手里拿起竹竿之类个物事，装做武将个样子互相厮打，追逐，嬉戏。最近我辣1909年出版个《图画日报》上寻着一幅《卖香斗》个图画，上面还配有文句，讲：“八月中秋月团圞，烧只香斗保平安。斗面檀香铺几片，斗底木屑一大团。”上个世纪40年代末，50年代初，我还见过、白相过香斗，可惜，香斗早已绝迹了，迭种情景还保留辣记忆当中。

　　团圆饭吃过，香斗也烧过了，接下来是“走月亮”。满月当空，银光泻地，是最好个出游辰光。边闲逛，边赏月。迭歇辰光，闹猛地段边浪摆满各种各样个摊头，有吃食滩，有卖各种日用品。江南有首民歌迭能写：“木樨球压鬓间香，两两三三姐妹行，夜冷不嫌萝袖薄，路遥翻恨绣裙长。”还有一种是吃好夜饭之后去看戏。当时戏馆里演个大多是应时戏《唐明皇游月宫》。迭篇传奇写中秋佳节唐明皇想游月宫，请道长叶法善施法，伊拿云帚一指，眼门前一下子出现一条银桥，埃面一头直通月宫。一歇歇唐明皇到广寒宫，只看见桂花树下头，一群白衣仙女乘着白鸾翩翩起舞；庭阶浪向，仙女各执乐器演奏《霓裳羽衣曲》，唐明皇拿乐声一一默记辣心里。后来迭个故事拨拉梨园界编成戏剧搬上了舞台。京剧当中就有《游月宫》个戏目。我记得幼年辰光曾经跟了父亲去看过京剧《唐明皇游月宫》，印象当中舞台浪有月宫，有桂花树，还有弄枪使棒个开打。后来迭种应节戏好像勿大流行了，逐渐淡忘。