“天上一轮才捧出，人间万姓仰头看”，我【ng】俚崇明人拿中秋节叫“八月半”。还有自家个传统风俗习惯，过八月半搿天吃个物事，除脱月饼外，埃有芋艿、番芋、毛豆结、长生果、番瓜咾啥。

　　老里八早，收算一年一趟过八月半，也勿是家家人家吃得转月饼个，家境好个末买几只，推扳个末勿买。特别是农村里，铜钿呒得【没有】，除非卖脱几只蛋买只把月饼骗骗小囡，总话八月半吃过月疙瘩。搿辰光大人侪拿月饼省拨小囡吃，自家稍微掰一眼尝一尝。小囡也晓得，吃一只月饼是勿容易个，勿会大大舒舒咬一口个，特别是里向个心子，又甜又香，交关想吃又勿舍得吃脱，先是舌头舔舔甜味，然后再咬一小口，慢慢叫磨磨烊了嘴里，一只月饼要吃一天，就是吃仔一眼囥好，过一歇埃吃一眼。现在是大勿同特，乡下也好，城里也好，过八月半个月饼勿单买了多，还要高档，苏式个、广式个、甜个、椒盐个，百果个、蛋黄个、火腿个、海鲜个，欢喜个就买，囤垃屋里向，老个小个想吃啥就吃啥。番瓜是烧粥个，芋艿、长生果、番芋、毛豆结是煠来吃个。有个欢喜白煠勿摆盐，有个欢喜吃咸个，毛豆结两头个角剪脱，让咸味走进去。番芋本是甜个，摆了最高头，咸味走勿脱，吃出来就勿会甜勿甜咸勿咸了。

　　直到现在，八月半吃月饼、芋艿、番芋、毛豆结、长生果、番瓜粥，裁垃拉夜饭搿顿，到仔夜快末侪回转特，一家六门过八月半特。勿多一歇，香味就跟仔热气出来特，小囡问：“熟末呒熟”，真叫“煠蟹等勿得红”。

　　崇明人个赏月，也自有特色，假使是好天呒得大风勿大荫，就垃场心浪吃夜饭，男女老少团团坐，一边吃月饼、芋艿、番芋、毛豆结、长生果，一边看月亮，男客爱吃点酒，拿毛豆结、长生果审审。要是天色勿大好，八月半个夜饭就垃拉屋里吃，不过月亮总归是要看个，大人也好，小人也好，吃仔一歇出去望望，特别是小囡，跑进跑出，一歇进来话月亮大来咾，一歇进来话月亮圆来咾，一歇又进来话月亮打云里出来特，拉仔大人快去看。好点人睏到半夜把醒特，连牵豁下来隔窗子望望月亮，还有追到外头去看个了！

　　本文崇明方言特选：

　　收算【虽然】

　　总话【都讲】

　　呒得【没有】

　　月疙瘩【月饼】

　　大大舒舒【大口大口】

　　场心浪【院子里】

　　审审【过过】

　　大来咾【很大的】

　　圆来咾【很远的】

　　出来特【出来了】

　　半夜把【半夜里】