小辰光到丹阳路娘舅拉去，外婆欢喜烧葱烤鲫鱼拨垃我阿爸姆妈吃，我也顺汤顺水一饱口福。搿辰光，外婆围【yhu】身头束好，拿铁镬子炖垃煤球炉上头，伊就坐垃竹椅子浪向，等镬子烧得来冒出一股铁味道，就笃悠悠个朝镬子里倒半汤盏黄了发亮个菜油，油一热，马上拿整根头个一大把碧绿生青个小葱摆垃油里煸，搿个辰光噢，吃饭间里侪是个香葱个焦香味道。乃末外婆盛起葱，煎鲫鱼。葱油煎到鱼皮收缩，鱼身黄里带焦，就盛起鱼来，拿煎好个葱再铺垃镬底里，拿鲫鱼一条条排垃葱浪向，开始烹点黄酒，倒进酱油，放点糖，加眼水，盖牢镬盖，外婆讲搿能介鱼肉会得吃进葱个香味跟酱油个鲜味。伊一头烧一头用铲刀拷汤汁到鱼高头，汤汁收干了再沿镬子边浇小半汤盏水，等到汤水吃进鱼里，镬底个葱烤出干香个辰光，马上盛起鲫鱼，再拿盛起来个葱横过来盖垃鱼浪向。葱烤鲫鱼就烧好了。不过外婆还要朝镬子里倒几调羹水，挥动铲刀用这眼水汏镬子，搿酱汤酱水一歇歇就笃开了，拿伊浇到刚刚烧好个菜浪向，搿葱又变得亮光光个，一眼也呒没浪费个。

　　姆妈讲外婆烧个葱烤鲫鱼顶有味道。搿辰光阿拉住垃奉贤乡下个小镇浪向，一年难得有几趟坐长途汽车到娘舅拉去，顶欢喜吃个就是外婆烧个葱烤鲫鱼。吃个辰光我最要吃葱，筷子搛牢仔葱，葱又脆又韧又香，又咸又甜又鲜，鱼个鲜味道侪垃拉搿里向；再吃鱼，鱼皮有一眼眼脆，鱼肉嫩搭搭，勿硬勿酥，葱个香味跟鱼个新鲜味道完全并到一道去了。

　　葱烤鲫鱼就是搿种味道：浓油赤酱，但是咸中带甜；葱香洋溢，但是香鲜适中。两种食材个长处，拨阿拉外婆跟教会外婆烧这道菜个长辈发挥到了极致。

　　几十年以后阿爸也烧过迭只菜，伊自己尝过味道以后讲：“老早姆妈烧了还要好吃”；我有一趟也买了半斤葱烧葱烤鲫鱼，结果烧勿出搿种老里八早个老好吃老好吃个，只能够留垃记忆当中个味道。

　　外婆的绝技呒没传下来，可能搿个是一门只可领悟不可言传个技艺。现在再也吃勿到迭只家常菜了，就算垃别地方品尝同样菜名个迭只菜，味道也已经完全勿是当年个搿种味道。不过我垃想：外婆搿辰光烧迭只菜是老自然个，垃伊看来搿是老平常个事体，就像饭垃钢盅锅子里烧开以后要慢慢较烘一样。烧葱烤鲫鱼个火候大小、作料多少、辰光长短、颜色浓淡，搿全部靠伊个感觉。搿真是一种本事。